सरकारले काठमाडौं उपत्यकामा बिहीबारदेखि लागू हुने गरी निषेधाज्ञा जारी गरेपछि उपत्यका छाडेर घर फर्किनेहरूको भिड लागेको छ ।
सोमबार साँझ बसेको मन्त्रिपरिषद् बैठकले काठमाडौं उपत्यकामा वैशाख १६ गते बिहीबारदेखि निषेधाज्ञा जारी गर्ने निर्णय गरेको थियो । त्यसैले मंगलबार बिहानैदेखि काठमाडौं उपत्यका छाडेर घर फर्किनेहरूको भिड लागेको छ ।
खासगरी काेटेश्वर नाका र थानकोट नाकामा उपत्यका छाड्नेहरूको भिड बढेको छ । त्यसबाहेक बालाजुतर्फको नाका र बल्खु नाकामा समेत उपत्यका छाड्ने मानिसको भिड लागेको छ । सरकारले काठमाडौं उपत्यकामा बिहीबारदेखि लागू हुने गरी दुई हप्ता निषेधाज्ञा जारी गरेको छ ।
केही समयअघिसम्म यात्रुविहीन गुडेका सवारीसाधनले खाँदाखाँद यात्रु लिएर उपत्यका छाडेका छन् ।
