बौनिया, फागुन १४
बालबाटिका क्रिकेट लिग–३ को ट्रफी तथा खेल तालिका सार्वजनिक गरिएको छ। बालबाटिका बिद्या मन्दिरका संस्थापक तथा खेलकुद संयोजक प्रमोद मल्लले ट्रफी र खेल तालिका सार्वजनिक गरेका हुन्। मंगलबार देखि सुरु हुने प्रतियोगिताको ट्रफी सार्वजनिक गर्दै मल्लले प्रतियोगिताले बर्दगोरियालाई क्रिकेटको सहर बनाउन मद्दत पुग्ने बताए।
प्रतियोगितामा कैलाली र कञ्चनपुरका गरी ८ वटा विद्यालयको सहभागीता रहने आयोजकले जानकारी दिएको छ ।
अण्डर –१९ टि–२० फरम्याटमा खेलाइने प्रतियोगितामा सहभागी ८ विद्यालयका टिमलाई समूह ‘ए’ र ‘बी’ गरी दुई समूहमा विभाजन गरिएको छ। जस अनुसार समूह ‘ए’ मा गुरुकुल इङ्लिस मेडियम स्कुल, कर्णाली माबी टिकापुर,गणेशबाबा टिकापुर र होलिल्याण्ड अत्तरिया रहेका छन्।
त्यसै गरी समूह ‘बी’ मा आयोजक बालबाटिका बिद्या मन्दिर बौनिया, विद्या भूषण पब्लिक स्कुल धनगढी,संत निरंकारी टिकापुर र लिटिल बुद्ध महेन्द्रनगर रहेका छन्।
यस्तै मंगलबार देखि हुने उद्घाटन खेलमा दोस्रो संस्करणको विजेता गुरुकुल इङ्लिस मेडियम स्कुल मोतिपुर र कर्णाली मा वि टिकापुर भिड्ने छन् । प्रतियोगिताको विजेतालाई १ लाख ५० हजार र उपविजेतालाई ७५ हजार नगदसहित ट्रफी, मेडल र प्रमाणपत्र प्रदान गरिने छ। प्रतियोगितामा सबै भन्दा उत्कृष्ट खेलाडीलाई नगद १६ हजार ,मेडल , ट्रफी प्रदान गरिने छ भने ,उत्कृष्ट ब्याट्सम्यान ,उत्कृष्ट बलर र उदयिमान खेलाडिलाई जनही १०/१० ह्जार नगद सहित ट्रफी ,मेडल प्रमाणपत्र प्रदान गरिने आयोजकले जानकारी दिएको छ ।
कार्यक्रममा बोल्दै गुरुकुल इङ्लिस मेडियम स्कुलका संस्थापक माधव थापाले निजि स्तरमा यति ठूलो प्रतियोगिता गर्नु आफैमा चुनौती रहेको बताए । उनले प्रतियोगिताले बिद्यार्थीको मनोबल उच्च पार्नुका साथै शारीरिक रुपमा शसक्त बन्न सहयोग पुग्ने बताए ।
बालबाटिका क्रिकेट लिग–३ को ट्रफी तथा खेल तालिका सार्वजनिक
